كلمة الرئيس السيسي اليوم خلال افتتاح مشروع “بشاير الخير 2”

وأضاف: “كل قائد تعبوى مسؤول مع مديرى الأمن والمحافظ على الكلام ده، وهنشوف هنقدر ناخد حقوق الدولة من الناس زى ما بنديهم حقهم ولا لأ”؟.

وفى سياق منفصل، دعا الرئيس السيسي الأسر إلى أهمية تنظيم النسل، معلقًا على إحدى السيدات التى قالت بأحد الأفلام التسجيلية إنها أنجبت 6 أطفال: “مش تفكرى هاتجيبى الستة تنيميهم فين؟، إحنا بنحل مسألة لكن لازم كلنا نتوقف، مجتمع مدنى، مساجد، كنائس، إعلام، حد يقول ميتعلموش، ولكن مقدرش لازم نعملهم، وانتى بتحكى الحكاية كأن أنا أو الدولة مقصرين فى حقك ..لأ والله، انتى اللى مقصرة فى حق نفسك، إنتى قاعدة فى أوضة، تجيبى 4، تنيميهم إزاى؟ تعلميهم إزاى؟ تصرفى عليهم إزاى؟، فيه حد يقول متتكلمش الكلام ده خلى الناس تحبك، والله ربنا مطلع عليا، وعالم ده مصلحة ولا مش مصلحة؟.

وجه الرئيس عبد الفتاح السيسى، رسالة للمالية والمحليات، قائلا :”لما نعمل عقود مع ناس مدنيين من أهلنا مش هينفع نبقى ناسيين ناخد الفلوس، ولا يتم تحصيلها بالسنين الطويلة وندخل فى نزاع.. دا كلام غريب ومحدش واخد باله منه، وخاصة فى الحديقة الدولية.. يا تعمل عقد حكومى والعقد أوله فى إسكندرية وآخره فى أسوان.. وثيقة مؤمنة تخرج لكل الناس وتقول لكل واحد حقنا إيه.. انت تاخد وإحنا ناخد.. لكن انت تاخد لوحدك لا.. إحنا كلنا كمسئولين مش بناخد بالنا من حق الدولة وهذا أمر لن أسمح به، وكل مسئول ينتبه لكل قرش.. ندى للناس حقها وناخد حقنا”.

وأضاف الرئيس : “معقول نعمل عقد بـ 20 أو 25 يتم دفع ستة والباقى لا.. الحديقة الدولية والشلالات مسئولية المنطقة الشمالية العسكرية، حتى تنتظم الأمور والدولة تاخد حقها مظبوط فى هذا الأمر القديم قبل الجديد.. الناس تاخد الحاجة بتلاتة قروش وميدفعوش كمان!.. المسئولين بالدولة من أول وزير المالية والمحافظ عينه على كل جنيه وكل عقد فى محافظته، يشوفه ويعرف دخله عشان الغلابة، أقول ذلك كى ننتبه فى إسكندرية وكل حته.. أنا بلاقى محلات مؤجرة بقالها 20 سنة بأرقام هزيلة.. وماله نحترم العقد بس الناس تسدد.. لكن إذا لم تسدد وتدخل فى قضايا.. لا دا حتى مايرضيش ربنا.. إنك تاخد وتكبر والغلابة تضيع كدًا.. الثلاث مناطق مسئولية المنطقة الشمالية العسكرية وكل جنيه ميجيش الناس تمشى”.

واصل:” ناخد حقنا مظبوط يا إما الناس تمشى إحنا مش بنخاف إلا من ربنا..دا كلام ميرضيش ربنا إننا ندى الناس الحاجة من غير فلوس، والناس تكسب مئات الالوف والملايين ومش عاوزة تدفع حق الدولة،  والكلام دا مش هيمشى معايا فى أى حته فى مصر.. دا كلام ميرضيش ربنا ولا الوطن.. أنا مش زعلان من الناس بل زعلان علينا وعلى حالنا عن الناس بتستبيح وفاكرة إن المال دا مش حرام.. لا دا مال حرام.. وتروح تحج وتعمل عمرة.. انت بتاكل المال اليتيم بتاع الدولة.. والكلام دا ينطبق على المحاجر وكل حاجة.. ونعمل قانون للمحاجر”.

قال الرئيس عبد الفتاح السيسى، إن عجز شبكات الصرف على استيعاب مياه المطر، يرجع للبناء العشوائى الذى لا تتناسب مع قدرات المجتمع الموجودة، قائلًا للمسئولين :”اشرحوا للناس سبب عدم قدرة شبكات الصرف على استيعاب مياه المطر.. لأنها كانت مجهزة لعدد عمارات ووحدات بشكل وارتفاع معين ولكن حدث أن تضاعفت هذه الوحدات.. والدولة تجرى دايما عشان تلاحق التطور”، مؤكدًا على أهمية مشروعات الإسكان الاجتماعى وسباق الزمن للقضاء على هذه الأزمة.

وأضاف أن المحافظ ومدراء الأمن والداخلية والقوات المسلحة معنيين بتحقيق الانضباط، موضحا :”وأنا جاى بالطائرة رأيت المناطق غرب المطار وجنوبه، فى النزهة.. الناس بتبنى .. بيبنوا إيه.. الأراضى غير مخططة، ولم يحصلوا على تراخيص، فلماذا يصمت المسئولون؟.. عشان هما كتير؟.. يعنى هيغلبوا بالكثرة؟”، موجهًا حديثه لمدير أمن إسكندرية والداخلية، :”الكلام دا فيه تجاوز شديد، الناس تعودت عليه ولم يعد مقبولاً الآن.. هنفضل تعابنين ودولة تعبانة.. الناس بتعمل الغلط وأنا عاوز ألحقهم فبعمل الغلط معاهم!.. اللى إحنا بنعمله دا صح وترفيقه والترخيص هو دا الصح.. نحن فى مصر تعودنا على إننا نغلط، والبعض يظن أن الدولة لن تفعل شيء بسبب الإعداد الكبيرة.. والكلام دا لازم ينتهى فى الدولة دى إذا كنتم تريدون أن تبقى مصر دولة ذات قيمة ومكانة.. الكلام دا للمسئولين والمواطنين ومش معقول عاوزين تحطوا فى جيبكم بس!”.

وأوضح :”لا بد من العمل وفقًا للمخططات، أنا بكلمكم وفيه منطق وموضعية غائبة منذ سنوات طويلة فى البلد وهذا أمر غير مقبول.. فيه منطق مش مظبوط ومشى.. وأنا بقولكم الحق حق وإن لم يتبعه أحد، والباطل باطل وإن اتبعه الجميع.. وما تتحدثون عنه والتجاوزات”.

وتابع:”بحيرة كينج مريوط ترجع كما كانت وأحسن وهشيل كل المخالفات وهزيل كل اللى عمل حاجة وأقول ذلك لكل متجاوز.. محدش يقبل التعدى على مستقبل أولادنا.. البعض يظن أن الدولة مقصرة بسبب انقطاع المياه والصرف الصحى.. إحنا كمسئولين وكمواطنين علينا التزام تجاه بلدنا وأولادنا.. هذا الكلام موجود فى إسكندرية والقاهرة وكل محافظات الدولة.. قولوا لى اعمل إيه.. ولا أسكت.. إذا كان مطلوب منى أسكت أسكت.. أنتوا مش بتغيروا ولا صعبان عليكم بلدكم؟.. هو الحب كلام وناخد المكسب حتى لو لم سليمًا!.. بحيرة المنزلة عاوزة 30 مليار جنيه عشان تعود لما كانت عليه”.

وأشار إلى أن التعديات موجودة فى كل محافظة ولا يمكن السكوت عنها، مضيفًا :”مش معقول نصلح وناس معانا تعيقنا كلنا”، ووجه الرئيس السيسى المسئولين بالمنطقة الشمالية العسكرية ووزارة الداخلية بالتعاون مع المحافظ، مضيفًا:” عاوز يوم بيوم موقف بالتجاوزات فى المبانى والإزالات التى تجرى.. هذا الأمر أمن قومى.. لو سبت الناس البسطاء بضعفهم وغلبهم عايشة بهذه الطريقة فالبلد والله 3 أو 4 سنوات هتتهد.. بس إحنا كأجهزة لازم نحط إيدنا فى إيد بعض عشان نمنع الكلام ده”.

و طالب الرئيس عبد الفتاح السيسي المنطقة الشمالية العسكرية، بضبط عقود الحديقة الدولية بمحافظة الإسكندرية، مشددا على ضرورة تحصيل 400 مليون جنيه من الحديقة، أو إخلائها تماما.

واستعرض الدكتور عبد العزيز قنصوة، محافظ الإسكندرية، أهم المشروعات التى يتم تنفيذها على أرض المحافظة والمزمع تنفيذها خلال الفترة المقبلة، موضحًا: “عدد سكان الإسكندرية وصل إلى 5.5 مليون نسمة، هنلاقى إن سكان إسكندرية الجزء الأغلب يتركز في منطقة الشرق، رغم أن المخطط كان يستهدف الامتداد للغرب، نريد أن نجعل معدلات التنمية والتعداد السكانى تسير بشكل متوازن ومناسب”.

وقال محافظ الإسكندرية، إن حجم مديونية الحديقة الدولية بلغ 427 مليون جنيه، ودخلها يقدر بـ 500 ألف جنيه سنوياً، ليقاطعه الرئيس متسائلا: “لما يكون فيه 400 مليون مديونية يبقى الناس ماكانوش بيدفعوا إيجاراتهم من عشرين سنة، يبقى ده معناه إنهم بقالهم عشرين سنة مادفعوش”.

وأضاف الرئيس السيسي:” المنطقة الشمالية العسكرية هى المسئولة عن الموضوع.. يا يجيبولي 400 مليون جنيه يا تفضى.. وعاوز تقرير كل 15 يوم .. ياناخد حقنا يابلاش”، موجهًا بعمل عقود سليمة تضمن حق الدولة.

وشدد الرئيس فى هذا الإطار:”تتعمل عقود مظبوط أو بلاش منها خالص، بلاش من الحديقة الدولية خالص”.

وقال اللواء أحمد العزازى، رئيس الشعبة الهندسية بالمنطقة الشمالية العسكرية، إن دخل الحديقة يتراوح ما بين 200 إلى 300 ألف جنيه شهرياً، وتم فسخ كافة عقود المتخلفين عن السداد اعتبارًا منذ نوفمبر 2018، وأبرمت عقودا جديدة، مؤكدا:”حالياً المستثمرين اللى عليهم مبالغ بيسددوا”

داعب الرئيس عبدالفتاح السيسي، المصريين، قائلا:” حجم النكت اللى طلع على الوزن الزائد فوق الخيال، ومعرفش هيطلعوا نكت إيه النهاردة؟، وأرجو تنكتوا على مهلكم شوية عليا”.

واستنكر الرئيس السيسي بعض ما تم تأويله فى هذا الشأن قائلا:”حد يقول بعاير .. هعاير أهلى؟!، المصريين أهلى وهفضل أبص عليهم، علشان اطمن على ولادى اللى هما مستقبل بكره هما بياكلوا إيه؟”.

ودعا الرئيس السيسي، الآباء والآمهات بضرورة الاهتمام بالنمط الغذائى لأطفالهم قائلا: “بقول لكل أم وأب فى البيت خاللى بالك من صحة طفلك، بعض الأكلات بتتخن وتضعف من قوته وصحته وتزود وزنه”.

و”بشائر الخير 2″ هو المرحلة الثانية لاستكمال مشروع التطوير الحضاري لمنطقة غيط العنب والذي شملت فيه المرحلة الأولى 1632 وحدة سكنية، ويتضمن المشروع إنشاء 18 بلوكا وعمارة فردية بإجمالي 37 عمارة تشمل 1869 وحدة سكنية.